Myanmar election official kaphlum

Myanmar sipai sorkar hnuaia Union Election Commission deputy director Sai Kyaw Thu chu Inrinni liam ta khan Yangon khawpuiah kahhlum a ni.

Army information team chuan thuchhuah siamin, Sai Kyaw Thu hi Yangon khawpui khawchhak lamah kahhlum a nih thu leh, he inthahna thlenga mawhphurtu chu sipai sorkar dodaltu, 'People's Defence Forces' a nih thu a sawi bawk.

Kum 2021 February thlaa sipaiten civil sorkar paihthlaa thuneihna an chan hnuah, sipai sorkar dodaltu civil mite chuan “People’s Defence Forces” hi an din ve nghal a, sipaite leh an thawhpuite an bitum a ni.

Sipai leh sipai sorkar dodaltu inkarah inbeihna hi a la thleng reng a, sipai official tenau deuh emaw, sipaite hnena thu thlentu (hektu) an tihte chu thah an ni fo a ni. Nikum Arpil thla khan sipai sorkarin Myanmar central bank deputy governor atan a ruat chu mi tu tih hriat lohten Yangon-a a chenna inah an kaphlum a, kum 2021 November thla khan sipai leh Vietnam firm Viettel thawhdunna, Mytel-a top executive chu a chenna in bulah kahhlum a lo ni tawh bawk.