Russia-in an rama German diplomat 20 chuang a hnawt chhuak dawn

Russia foreign ministry chuan an rama German diplomat 20 chuang chu an hnawt chhuak dawn tih a puang a, hei hi Germany-in Berlin-a Russian embassy staff-te a hnawhchhuah an chhanletna a ni.

Foreign ministry thupuangtu, Maria Zakharove chuan Inrinni khan Russia sorkar enkawl Zvezda television hnenah, German diplomat-te hnawh chhuah an nih tur thu hi a sawi a ni. Hemi rual hian Germany-in Russian diplomat mission-a thawkte a hnawt chhuah chu an dem thu a sawi nghal bawk.

Russia chuan Germany chu Russia-Germany inlaichinna tichhiaah a puh a, Germany chet dan mawi lo tak avangin Russia chuan a chhan let ve a ngai a, German diplomat-te hnawhchhuah chu a rel ta a ni, a ti. Russia chuan an rama German diplomat mission hnuaia thawktu awm thei zat pawh a bithliah dawn tih a sawi bawk a ni.

Kar liam ta khan Russia chuan Canadian official 333-te hrekna a lo tichhuak tawh bawk a, hei hi Canada-in langsar taka Ukraine a thlawpna lantir leh, Russia mi hrekna a siam avang a nih thu a sawi. Canada rama Russia mite enhranna nasa tak a thleng nia sawiin, Russia mi leh sate chu zin lo turin a chah bawk.