Sudan-a ram dang mi awmte hruai chhuak mek
Sudan ram tualchhung indona thlengin zual lam a pan zel avangin, ram hrang hrangte chuan Sudan-a an mi leh sa awmte an hruai chhuak mek.
Sudan khawpui, Khartoum-ah Sudan Army leh paramilitary group, Rapid Support Forces (RSF) chu nimin khan a ni 10-na atan an la inkap chhunzawm zel. Pawl pahnihte inbeihna avang hian khawpuia cheng mi tam tak chu pawnchhuak ngam loin inah an tang a, ei tur leh tui thlengin an tlachham ṭan tawh nia sawi a ni.
US chuan tualchhung indona thleng vang hian Sudan-a a embassy staff-te an hruai chhuak tawh a, UK pawhin British diplomat leh an chhungte chu an hruai chhuak tawh bawk. Germany leh France chuan Sudan-a an mi leh sa awmte hruai chhuah hna an kalpui mek tih sawiin, Europe ram dangte pawhin chhanchhuah hna hi an thawk dawn tih an sawi a ni.
France chuan Pathianni khan thlawhtheihna pahnih hmangin mi 200 vel a hruai chhuak a, hei bakah hian Khartoum aṭang hian khawchhak lama lawngchawlhna hmun, Port Sudan panin UN motor leh bus eng emaw zat an tlan chhuak bawk. Heng motor-ah hian Sudan chhuahsan tum, ram hrang hrang mi an chuang a ni. Ram dang mi awmte bakah, Sudan ram mi ngei mi sang telin an ram hi an chhuahsan tawh a, a tam zawk chu an ṭhenawm Chad ramah an tlanchhe tawh bawk.
Khartoum bakah Sudan ram khawpui dangah pawh ram dang mi zirlai tangkhang an awm mek a, mahse tualchhung indona thleng vanga ram pumah internet tihtawp vek a nih vangin, inbiakpawhna lamah harsatna a awm a ni.