Israel-in ralthuam leh gold tawlhluta puh Jordan MP a man

Israel chuan Jordan ram Parliament member pakhat chu Palestinian ram a luah, West Bank-a ralthuam leh gold tawlh­luh tuma puh chung­changah a man niin Jordan foreign ministry chuan a sawi.

Jordan MP Imad al-Adwan hian Pathianni khan Jordan lui sir lam aṭangin a car hmangin border crossing a paltlang a, Israel thuneituten lo man­in thu zawhfiah turin an hreng zui tih Jordan foreign ministry thupuangtu, Sinan Majali chuan a sawi a ni. An ministry chuan al-Adwan chunga thil thleng chungchang leh, a rang thei anga chinfel dan ngaihtuahin hma an lak nghal thu a sawi bawk.

Kum 35 mi, al-Adwan hi Jordan Parliament-a Palestine Committee member a ni.

Israel thuneitute lam chuan Jordan MP chung­changah hian thusawi leh thuchhuah engmah an la nei lo a, mahse Israel media-te chuan al-Adwan hi West Bank-a King Hussein Bridge (Allenby) border crossing-ah man a ni tih an tarlang.

Custom officer-te hian dan pangngaiah chuan Parliament member-te hi an lo dap thei lo a, mahse Jordan minister chungchangah hian intelligence lam aṭanga information an dawn avangin, a chuanna motor chu lo tidingin an enfiah a ni. A motor aṭang hian rangkachak kg 100, long weapon 12, ZIG pistol 12 leh Glock pistol 167 an man niin media report chuan an tarlang bawk.