Beirut lawng chawlhna hmun puakah mi 100 chuang an thi

Lebanon khawpui, Beirut-ah Thawhlehni zan khan lawng chawlhna hmunah puak thei thil tam tham tak dahna, warehouse chu na taka puakin a kang zui. He chhiatna thlengah hian mi 100 chuang an thi nia sawi a ni a, mi 4,000 chuangin hliam an tuar bawk. 

Thawhlehni zana thil puak hi a na in a nghawng zau hle. In leh motor tam tak a tichhia a, khawpui dai thleng pawhin a nghawng pha niin official-te chuan an sawi. Km 240-a hla, Cyprus-ah pawh thil puak nghawr hi an hre pha a ni. In chim leh thil chhe dang hnuaiah mi tam tak an tang a, chhanchhuah hna thawh mek niin chin hriat loha awm mi eng emaw zat an la awm avangin official-te chuan thi zat pawh hi an la punchhoh a rinawm tih an sawi. 

Official-te chuan thil puahna hmun hi kum ruk chhung ware­house-a dahṭhat tawh, ammonium nitrate ton 2,750 zet awmna niin an sawi. Mahse kum ruk chhung him taka dah a nih tawh hnua a puahna chhan hi hriat a ni lo a, chhui zui nghal a ni. Official lam chuan a puah chhan hi an sawilang lo a, hetihlai hian media ṭhenkhat chuan warehouse-a welding hna thawhna aṭanga rawn inṭan niin an sawi. He thil thlenga mawhphurtute chu hremna na thei ang ber pek an ni dawn tih Supreme Defence Council chuan a sawi. 

Nimin khan President Michel Aoun chuan cabinet meeting hman­hmawh a ko nghal a, kar hnih chhung emergency puan a ni dawn tih a sawi. Emergency fund atan sorkar chuan US dollar maktaduai 66 a pe chhuak dawn tih a sawi bawk. He chhiatna thlenga thite sunna hi ni thum chhung neih a ni dawn a, nimin aṭang khan neih ṭan a ni. 

Kum 2005-a prime minister hlui Rafif al-Hariri leh mi dang 21-te bomb hmanga tihluma puh, Shiiti Mulsim group, Hebzabollah member palite thubuai UN thlawp court-in a rel fel hma ni thumah Beirut-a chhiatna rapthlak tak hi a thleng a ni. Hei vang hian lawng chawlhna hmuna thil puak hi in beihna zawk anga ngai pawh mi eng emaw zat an awm. 

Lebanon nena indo fo, Israel chuan Beirut-a chhiatna thlengah inhnamhnawihna a neih loh thu a sawi bawk. He thil thleng hi pawi an tih thu leh, chhawmdawl hna leh damdawi lama enkawlna kawngah Lebanon sorkar puih a inhuam reng thu a sawi a ni. Ram hrang hrangin Beirut-a thil thleng chu pawi an tih thu leh, an theih anga Lebanon sorkar puih an inhuam thu an sawi. 

Hliam tuarte enkawlna turin Qatar leh Iraq chuan makeshift hospital siamna tur an thawn nghal a; US, Britain, France leh Germany pawhin pui turin an inpeih reng tih an sawi bawk.