Sudan-a indo mekten darkar 72 inkahhai puan an remti

Sudan rama indo mek, Sudanese Armed Forces (SAF) leh Rapid Support Forces (RSF) paramilitary force-te chuan Thawhṭann zan zanlai aṭang khan darkar 72 chhung inkahhai puan an remti.

US chuan Sudan tualchhung indona thleng mekah, inkahhai puan a nih theihna atan hma a la a, pawl pahnih hotute hi ngunthluk taka inbiakna neihpui a nih hnuah inkahhai puan hi an remti thei ta niin secretary of state Antony Blinken chuan a sawi.

A hma pawhin SAF leh SRF hian inkahhai hi an lo puang tawh a, mahse an inremna hi an bawhchhe zui nghal ve ve a ni. Mahse US hmalaknaa inremna an siam hi zawm an tum thu an sawi ve ve.

RSF chuan an twitter-ah ni thum chhung atana inkahhai puan a nih thu hi tarlangin, boruak ṭha tak hnuaiah mipuiten an mamawhte an lamkhawm a, ramdang mite pawh an mi leh sate him taka an lakchhuah theihna tura ruahman a ni tih a tarlang.

UN secrertary-general Antonio Gutterres chuan Sudan buaina chu a punlun zel a hlauh­­awm thu leh, an buaina hian hmun dang a kankai a hlauhthawm thu a lo sawi tawh a ni.

Army chief Abdel Fattah kaihhruai SAF leh a deputy hlui, Mohamed Hamdan Daglo kaihhruai RSF-te hi ni 12 liam ta khan an rama thuneitu zawk nih inchuhin an inbei ṭan a ni. Tualchhung indona thleng vang hian mi 427 an thi tawh a, mi 3,700 chuangin hliam an tuar tawh bawk niin UN agency-te chuan an tarlang.

Tualchhung indona thleng vang hian ram hrang hrangte chuan Sudan rama an mi leh sa awmte thiar chhuah hna an thawk mek a, Sudan mi ngei pawh tam tak chu an ṭhenawm, South Sudan leh Chad ramah an tlanchhe tawh bawk.

United Nations chuan South Sudan leh Chad rama tlanchhia hi mi nuai 2.7 vel an tlin chhoh mai a rinawm thu a sawi. Chad rama UN refugee agency representative, Laura Lo Castro chuan an ramah refugee 20,000 vel an lut tawh a, luh belh awm zelin mi nuai khat vel an la tlin a rinawm tih a sawi. South Sudan-ah pawh a hmaa Sudan rama tlanchhia mi tam tak chu an ram lamah hian kir lehin, Sudan ram aṭangin mi tam tak an tlanchhe lut tawh bawk a ni.

Kum 2021-a sipai chakna hmanga civil sorkar paihthlak a nih hnuah, Sudan ram hi Gen Abdel Fattah al-Burhan leh a deputy, RSF hotu Gen Mohamed Hamdan Dagalo kaihhruai council of generals rorelna hnuaiah a awm a ni. Mahse sipai hotu pahnihte hian an ram inrelbawl dan leh, civil sorkar din rawt chungchangah an ngaihdan a in mil lo a, hei bakah hian paramilitary force, RSF-te regular army-a dah phut chungchangah pawh an inmil lo bawk.

Gen Dagalo chuan Gen Burhan kaihhruai sorkar chu Islamist firfiak ang maia kalah puhin, RSF chuan Sudan mipuiten democracy an beisei ang an hmuh ngei theihna turin an bei dawn tih a sawi. Hetih lai hian Gen Burhan chuan mipuiin an aiawh tura an thlan sorkar kutah chauh thuneihna a hlanchhawng dawn tih a sawi ve bawk a ni.