UN hotu hluiin Myanmar tan theihtawp chhuah a tum

United Nations secre­tary general hlui, Ban Ki-moon chuan kum 2021, February thlaa Myanmar sipaiten an rama civil sorkar an paihthlak hnua tualchhung buaina chhuakte tireh a, boruak muanawm leh ramdangten an pawmpui sorkar a din leh theihna atan theihtawp a chhuah dawn tih a sawi. Hemi rual hian Myanmar ram tualchhung buaina thleng mek chu titawp turin a ngen bawk.

Ban Ki-moon hian sipai sawmna angin Thawhṭanni khan Myan­mar ram hi a tlawh a, Naypydiaw-ah sipai hotu, senior general Min Aung Hlaing leh official dangte a hmu a ni.

Meeting zawhah thuchhuah siamin, Ban chuan, "Sipaite-te chu ramchhunga tharum thawhna thlengte titawp tur leh, inremna a awm theihna atan party hrang hrangte inbiakna neihpui tura nawr turin Myanmar-ah hian ka lo kal a ni," a ti. Inbiakna neihah sipaiten an paihthlak tlak, mipuite'n an aiawh atana an lo thlanchhuah tawhte leh democracy activist-ten mipui sorkar aiawh atana an din, National Unity Government (NUG) chu tel tir ve zel a ṭul tih a sawi.

Ban hian sipai hotute bakah, kum 2011-2016 inkara civil sorkara president, Thein Sein pawh a hmu bawk. Aung San Suu Kyi a hmuh leh hmuh loh erawh sawilan tel a ni lo.