Kenya Pastor ramah ruang 83 hmu chhuak tawh

Kenya rama Good News International Church pastor, Paul Mackenzie Nthenge ramah ruang hmuh belh leh niin, pastor-in amah zuitute thih thlenga chaw nghei tura a zirtir avanga thi ruang an hmuh hi 83 an tling tawh.

Kenya police-te chuan pastor Nthenge hi man tawhin, an chhui chiang mek a ni. Pastor hian amah zuitute chu Isua an hmuh theihna turin thih thlenga chaw nghei turin a zirtir a ni. Thawhlehni khan a zirtir zinga mi 10 ruang hi hmuh belh leh an ni a, an zingah hian naupang pathum an tel.

Haki Africa rights group executive director, Hussein Khalid chuan Good News International Church member ṭhenkhat chu an la biru niin a sawi a, heng mite hi chhanchhuah thuai an nih loh chuan an thih ve leh mai a hlauhthawnawm thu a sawi. Thuneitute hnenah kohhran member la awmte zawn leh chhan­chhuah hna thawk tura mi tam zawk tir turin a ngen.

Investigator-te chuan ruang ṭhenkhat chu thlan pakhatah an awm­khawmte hmuh a nih thu leh, ṭhenkhat chu phum loha awmte an ni tih an sawi.