Israel-in an sipai thi te hriatrengna hun hmang

Israel chuan nimin khan indonaa an sipai thite leh, firfiakte beihna avanga Israel mi thite hriatrengna, National Memorial Day a hmang.

National Memorial Day lo thleng tur pual hian nimin zing khan ram pumah minute hnih chhung siren tihrik a ni. Hemi hnu hian Jerusalem-a Western Walloah hun hman niin president Isaac Herzog, chief of forces Herzi Halevi, sipai leh police officer-te bakah, sipai thi chhungte an tel.

Nimin khan prime minister Benjamin Netanyahu chuan sipai thlanmual awmna, Mount Herzl tlawhin thu a sawi bawk.

Israel defence ministry-in a tarlan danin, kum 1860 aṭang khan an ram sipai, police officer, police warden, Shin Bet security agent leh Mossad agent 2,42,143 thah an ni tawh a, heng bakah hian firfiakte pawikhawihnaah civil mi 4,255 an thi tawh bawk.

Nikum leh kumina Memorial Day an hman inkarah hian sipai thi leh firfiakte beihna avanga thi hi mi 59 an awm a ni.

Nimina Samaria-a National Memo­rial Day puala running event buat­saiha telte chu taxi chhung aṭangin Palestenian mi nia hriat mi pakhatin silaiin a kap a, mi pakhat a kutah kap hliamin emergency medic-ten an en hnuah, Jerusalem-a Shaare Zedek Hospital-ah kalpui a ni.

Israel sipaite chuan pawikhawihtu hi man tumin an zawng mek a ni.