Biden-a'n official-in inthlan chuh leh a tum thu puang ta

US president Joe Biden chuan 2024-a US President thlanna neih turah chuh leh a tum thu official-a puangin, campaign video a tichhuak.

Kum 80 mi, Democrat Joe Biden hian nimin khan President chuh leh a tum tih a puang a ni. President hlui, Republican Donald Trump pawhin inthlan hi chuh leh a tum tih a lo puang tawh bawk a, an pahnih hian an inhmachhawn maithei a ni.

Tun hnaia ngaihdan lakah, Democrats tam zawk chuan Republican ai chuan President atan an thlawp zawk dawn tih an sawi. Mahse Biden hi President a nih hnuah amah duhtu, approval rate a hniam chak hle a, a kum upat tawh avangin President thlan nawn leh duh loh an awm phah bawk. Term tharah President atana thlan tlin leh a nih chuan, a term hnihna tawpah Biden hi kum 86 mi a ni tawh ang.

2024 President inthlan neih turah Democrat presidential candidate chuh tum mi eng emaw zat an awm tawh a, an zingah hian self-help guru Marriane Williamson leh anti-vaccine activist Robert Kennedy Jr-te pawh an tel. Mahse President ṭanglai a nih angin, Biden hian midang aiin hma a hruai rin a ni. Democrats hian an presidential candidate tur hi nakkum August thlaa party national convention, Chicago-a an neih hunah an puang dawn a ni.

Trump-Biden inbitum dawn em?

Republican party lamah pawh party president candidate chuh tum zingah Donald Trump chu hmahruaitua rin ber a ni.

President hlui hi nikum November thla khan inthlana chuh leh a tum thu hi a lo sawi tawh a, mahse hemi hnu hian thubuai hrang hrang a hmachhawn zui leh a ni.

NBC News-in mipui ngaih­dan a lak thar berah, Republican primary voter zinga 46% chuan an party presidential candidate-ah Trump hi an thlawp dawn tih an sawi. Party candidate atan hian Florida governor Ron DeSantis chuan duhtu 31% a nei. Mahse DeSantis hian official-in party candidate chuh a tum thu a la puang lo.

Trump hian Republican nomination a chang pha a nih chuan Biden nen an in hmachhawn leh theih rin a ni a, kum 2020 election rematch kan hmu leh dawn a ni.