Sri Lanka-in Parliament inthlanna nei

Sri Lanka parliamentary election chu ṭum hnih ngawt Covid-19 vanga sawn hlat a nih hnuah nimin khan inthlanna neih a ni. 

Sri Lanka mipui maktaduai 21 chuang zingah vote nei mi mtd 16.23 an awm a, he inthlanah hian party 70 vel an awm bakah independent group hi 313 an awm bawk a, candidate hi mi 7,452 an awm. Nimin zing dar 7:00 aṭang khan vote thlak ṭan a ni a, Election Commission chuan an rama health department-in guideline a siam zulzuiin inthlan hi an buatsaih thu an tarlang a, vote thlaktute hian an hmai an tuam bakah, midang hlata awm leh vote an thlakna tur ballot paper a an thai na tur pen emaw pencil mahniin an inken vek bawk. 

Nimina inthlan an huaihawt chungchangah hian Election Commission chairman Mahinda Deshapriya chuan polling station-ah invenna khauh tak kalpui a nih vangin Covid-19 kai darh a hlauhawm loh thu leh beach, restaurent leh market aiin a hlauhawm loh zawk thu a sawi. 

Kum 2018 khan president Maithripala Sirisena chuan Parliament ṭhiatin, inthlan hun atan January 5, 2019 a ruat. Mahse hei hi Surpeme court-a khin a nih hnuah SC chuan inthlan hun hi a tikhawtlai a, hemi hnu kumin April 20 khan EC chuan inthlan hun tur hi a puang a, mahse hri leng vangin tihkhawtlai a ngai leh ta a ni. Result hi Zirtawpnia peih fel hman tum a ni.

Sri Lanka-ah hian Covid-19 kai hi mi 2,834 an awm tawh a, heng zinga mi 2,524 chu enkawl dam tawh niin, he hri vanga thi hi mi 11 an awm tawh a ni.