UNSC session aṭangin Israel palai a chhuak

United Nations Security Council (UNSC) session neihna aṭangin UN-a Israel palai Gilad Erdan a chhuak tau.

Israel chuan Thawhlehni khan an ram tana ni pawimawh, an sipai thite leh firfiak kuta thite hriatrengna, National Memorial Day a hmang a, mahse hemi ni tak hian Palestinian-te chungchang sawiho turin UNSC session hi neih a ni.

Israel palai, Gilad Erdan chuan, "Israel ram tana ni pawimawh ber zinga mi a ni a, vawi tam tak kan hnam tana a pawimawhzia min hriatpuia session neih hun hi sawn turin kan ngen tawh a ni. Mahse vanduaithlak takin council chuan a thlak danglam duh lo a ni," tiin kum liam taa firfiakte kut tuara thi Israel mite hming a chhiar chhuak nghal bawk. An hming a chhiar zawhah a dawhkanah sunna atan bati dahin, chamber aṭangin a chhuak zui a ni.

Nilainia UNSC session kaihruaitu, Russia foreign minister Sergey Lavrov hnenah pawh Victory Day, May 9-ah session hi koin, Russian Federation leh a sipaite demna thute sawi vak se eng angin nge a ngaih ve ang, tiin Edran chuan a zawt let hial.

Israel-Palestinian buaina awm rengna chhan chu Palestinian lam luhlul vang a ni tiin, Security Council chu Israel chungchang ringawt thlurbing a, Iran-in an bial chhunga boruak tihchhiat tuma a chetdante ngaihthahsakah a puh bawk.

Erdan chuan Israel mipuiten an sipai thite leh an unau, firfiakte kut tuara thite suna lungchhe taka an awm laia, council-a Israel chetdan demna leh, buaina thlenga a bultumtu ber nia dik lo taka an puh dan ṭhin ang bawka an ram chungchang an sawi leh ṭhin chu a dem hle tih a sawi bawk.