China-in negative PCR test result phutna titawp dawn

China chuan 'zero-Covid' policy hnuaiah khuahkhirhna a siamte titawp chho zelin, Inrinni aṭang hian an rama lut turte tana negative PCR test result a phut ṭhin pawh a titawp tawh dawn.

Foreign ministry thu­puangtu, Mao Ning chuan khualzinte tan PCR test result entir kher tawh loin, China an pan hma darkar 48 chhunga negative antigen test result an neih chu pawmsak an ni tawh dawn a ni, a ti.

Covid-19 hri a len hnuah China hian hri laka invenna atan kum thum chhung chu khuahkhirhna khauh tak tak a siam a, hun rei tak inkharkhip puangin, mass testing pawh a nei fo a ni. Mahse hun rei tak khuahkhirhna khauh tak a siam hian sawisel a hlawh chho leh a, an ram economy in a tuar hnuah sorkar chuan nikum December thla aṭang khan a sut chho ṭan a ni. Kumin January thla tir khan quarantine rule pawh a lo titawp tawh bawk.

Tourism sector dinhmun siamṭhatna atan thla liam ta khan sorkar chuan visa hrang hrang a pechhuak leh ṭan tawh bawk. Khuahkhirhnate a thlahdul chhoh mek karah hian ram dang aṭanga China ram lut turte tana negative PCR test result a phutna erawh a la hmang chhunzawm reng thung. Mahse hei pawh hi tun kar tawp aṭang chuan a titawp ve leh dawn ta a ni.