2021-a Kabul Airport bomb-na ruahmantu IS hotu thah a ni

Afghanistan-a rorellai, Taliban-te chuan kum 2021-a Afghanistan khawpui, Kabul airport bomb-na tura ruahmantu, Islamic State (IS) hruaitu an that niin US official-te chuan an sawi. Kum 2021-a Taliban-ten Afghanistan-a thuneihna an chelh hnu khan an ram chhuahsan tuma Kabul airport-ah mi tam tak an punkhawm laiin, IS firfiakte hian airport hi an bomb a, civil mi 170 leh US sipai 13 an thi a ni.

US official-te chuan IS hruaitu an thah tak hming hi an tarlang tel lo a, kar eng emaw zat liam taa thah a ni tih leh, tun hnaiah finfiah chauh a nih thu an sawi. Taliban-te hian amah bik hi an bei nge, IS leh Taliban-te inbeihnaah thah a ni tih an sawichiang lo bawk.

Taliban-ten thuneihna an chan hnua US sipaiten an ram mi leh sate Afghanistan aṭanga thiarchhuah hna an thawh lai, kum 2021 August 26 khan Kabul airport luhna, Abby Gate-ah thihchilh bomb hi tihpuah a ni. He pawikhawihna thlen lai hian airport leh a chhehvelah hian Afghanistan an chhuahsan theih beisei mi tam tak an kalkhawm a ni. Pawikhawihna thlen hnu hian US chuan bomb tihpuahnaa mawhphurtu, ISIS-K hruiatu Sanaullah chanchin hrilh emaw, man thei emaw hnenah USD mtd 10 pek a tiam a ni.