Russia-Ukraine indo hnuah a ṭum khat nan Zelensky leh Xi an inbia

Russia-in Ukraine ram a run hnua a ṭum khatna atan, Nilaini khan Ukraine president Volodymyr Zelenskyy leh China president Xi Jinping-te chu telephone hmangin an inbia.

Ram pahnih hruaitute hi darkar khat chuang zet an inbia a, thil ṭha tak an sawidun theih thu leh, China lam pawhin inremna a awm theihna atana palai hna thawktu tur thawn a duh thu pawh a sawi niin Zelenskyy chuan a tarlang. Hei hian ram pahnihte inlaichinna kawngah pawh hmasawnna a thlen chhoh ngei a rin thu a sawi bawk.

China hi Russia ram ṭhianṭha tak niin, Russia-in Ukraine a run hnuah pawh a chetdan demna thuchhuah a siam ve loh avangin beih pawh a tawh phah fo a ni. March thla khan President Xi hian Russia tlawhin, Russia president Vladimir Putin nen meeting an nei. Hemi hnu hian Ukraine President Zelenskyy chuan Xi hi inbiakna neihpui turin a sawm ve leh a ni.

Nilainia an inbiaknaah hian, President Xi chuan China chuan boruak ṭha leh muanawm a awm a duh ber tih a sawi a, Ukraine ramah inremna siam theih dan ngaihtuahpui turin palai pawh tirh thuai a tum.

US pawhin Ukraine leh China hruaitute an inbe thei chu lawmawm a tih thu sawiin, US national security thupuangtu John Kirby chuan, "Thil ṭha tak a ni. Hei hian inremna siamna tur kawng a hawng thei dawn em tih erawh chu sawi mai theih a la ni rih lo," a ti.