US-in Sri Lankan Navy commander hlui hrekna siam
US chuan Sri Lankan Navy commander hlui, Wasantha Karranagod chu Liberation Tigers of Tamil Eelam (LTTE) nena an inbeih laia mihring dikna chanvo nasa taka palzutah puhin hrekna a siam.
Kum 2005-2009 chhung Navy Commander, kum 70 mi Wasantha Karannagoda hi kum 2009-a LTTE nena an inbeih kaihhnawiha US-in senior defence official a hrek pahnihna a ni. Kum 2020 khan US state department chuan tualchhung indona thlen laia Army divisional head, a hnuah commander ni ta leh tuna chief of defence staff ni mek Gen Shavendra Silva hrekna a lo siam tawh bawk a ni.
US secretary of state Antony Blinken chuan Nilaini khan thuchhuah siamin, Navy commander hlui Wasantha Karannagoda chu mihring dikna chanvo nasa tak a palzutsak avangin hrek a ni tih a sawi a, US chuan Sri Lanka tualchhung indona thlen mi tam tak tawrhna thleng chungchangah thu dik tak haichhuah zel a tum a ni, a ti.
Kum 1983 chho aṭang khan Sri Lanka sipai leh Tamilian-te tana ram hran sualtu, LTTE-te hi inbeiin, kum 2009 May khan sipaite chuan LTTE hruaitute thatin, tualchhung indona hi a tawp zui a ni. LTTE hotu lu ber, Velupillai Prabhakaran thah a nih hun tak hi hriatchian a ni lo a, Sri Lanka sipaite chuan May 19, 2009 khan thah a ni tawh tih chauhin an puang a ni. Hetih laia Sri Lanka president Mahinda Rajapaksa chuan kum 2009, May 18 khan kum 26 zet LTTE nena tualchhung indona an neih chu a tawp ta tih a puang. LTTE leh sorkar sipaite inbeih chhung hian mi nuai khat chuangin an thih phah a, Tamil hnam mi maktaduai tel chu ramchhung hmun dangah leh ram pawnahte himna zawngin an tlanchhe bawk.