Russia Court-in a article dah vangin Wikipedia pawisa chawitir leh

Russia Court chuan nimin khan Wikipedia neitu, Wikimedia Foundation chu Russia sipai kaihhnawih, tihchhuah phal loh chungchang article a dah chhunzawm zel avangin roubles maktaduai 2 (USD 24,510) chawi turin a ti leh.

Tun ṭum hi Russia-in article vanga Wikimedia sum a chawitir ṭum sarihna niin, sum chawi tura a tih hi a vaiin roubles mtd 8.4 a tling tawh.

Nimina court-in sum a chawitirna chhan hi Rusian sipai unit chungchanga 'classified military information' dah a, an awmna hmun, sipaite awmte leh an hmanruate bakah Ukraine-a beihpui an thlak meka an hmasawn dan a dahte paih tur tih tawh, an la paih duh loh vang a ni.

Wikimedia hian Russia-in hremna a pek chungchangah engmah sawi a la nei lo. Mahse a hmain Russia lamin an thil dah a sawisel hi mi rintlak tak aṭanga an dawn leh, Wikipedia kalphung nen pawha inmil vek a nih thu an lo sawi tawh.

Nikum February thlaa Russia-in Ukraine ram a run hnuah, Russia sorkar hian an ram chhunga online content tam tak a titawp a, a tihtawp loh tlemte zingah Wikipedia hi a tel a ni.