UNSC-in hmeichhe khuahkhirhna siam sût turin Taliban a phût

United Nations Security Council (UNSC) chuan Afghanistan-a rorellai, Taliban-in UN hnuaia Afghan hmeichhiate hna thawh a khapsak chu a dem thu sawiin, hemi rual hian an rama hmeichhiate khuahkhirhna hrang hrang a siamte chu sût turin a phût.

Ningani khan UNSC member 15-te chuan Taliban-te laka an thil phut chungchangah resolution hi lungrual takin an pass a ni. Taliban-ten hmeichhia khuahkhirhna an siam chu mihring dikna chanvo ngaih pawimawh lohna a ni, an ti. Hmeichhiate chuan zirna, hnathawh, chhuahvahna kawngah zalenna an nei ve vek tur a ni tiin, ram leh pawl hrang hrangte pawh Taliban-te chu hmeichhiate laka an policy thlak tura nawr turin a ngen zui bawk.

Taliban-te hian kum 2021-a an ram thuneihna an chan hnuah, hmeichhiate khuahkhirhna a siam chho zel a, zirna sang zawkah hmeichhiaten an zir chhunzawm a khapsak bakah,pawn lama hnathawka an chhuahte pawh a khap zui. Hemi hnu hian an laichin mipate tel lo chuan public place-a kal leh, hmun danga zinchhuahte a khap leh bawk a ni. April 4 khan Afhanistan-a UN office-a Afghan hmeichhiate hna thawh chhunzawm a khap bawk a, hei vang hian UN pawhin Afghanistan-a an mission chu a chhunzawm zel dawn em tih a ngaihtuah dawn. Hmeichhiate hnathawh chhunzawm phalsak an nih loh chuan, Afghanistan aṭang hian an inlakchhuah mai pawh a ngai dawn niin a lo sawi tawh a ni.