Kenya rama amah zuitute thata puh Pastor dang man leh

Kenya police-te chuan Ningani khan amah zuitute thata puh pastor dang pakhat an man leh.

Interior minister Kithure Kindiki chuan New Life Prayer Centre and Church pastor, Ezekiel Odero chu a kohhran mi leh sa eng emaw zat thatah puhin man a ni a, an biak-in pawh kharsak nghal a ni tih a sawi. Biak-in chhehvelah hian ruang 100 chuang hmuh an ni tawh niin a sawi bawk.

Tun hnaiah Good News International Church pastor, Paul Makenzi chu Isua Krista an hmuh theihna atan amah zuitute chu thih thlenga chaw nghei tura a zirtir avangin man a lo ni tawh a, a chenna hmun leh a chhehvel an dapnaah ruang 98 hmuh a ni tawh a ni.

New Life Prayer Centre and Church pastor Odero hi an biak-in awmna, Malini khuaah man a nih hnuin thu zawhfiah turin Mombasa-a regional police headquarters-ah sawn a ni. Man a nih lai pawh hian Bible a keng tlat a ni.

Oderoa hi televangelist niin, a thusawi hian mipui pawh a hip khawm hnem ṭhin hle. Malini-a an kohhran biak-inah hian mi 40,000 vel an leng a ni. Odero hian mega rally-te a nei a ṭhin a, heng hmunah hian puan thianghlim them nia a sawite hralhin, hei hian natna a tidam thei niin a sawi ṭhin.