Russia-in missile hmanga Ukraine a beihnaah mi 12 an thi

Russia chuan nimin zing khan missile hmangin Ukraine khawpuite a bei leh a, thla hnih dawn hnua beihpui a thlak nasa lehna ber niin, mi 12 an thi.

Russia-in a ram a luahsakte lakleh leh tuma Ukraine a inbuatsaih mek laiin, Russia missile hmangin an ram khawpui hrang hrangte beih a ni.

Uman khawpuiah chuan missile hian residential apartment building fuhin a kang zui a, mi 10 an thi. An zingah hian naupang pahnih an tel. Mi dang pakuain hliam tuarin damdawi-ah hruai nghal an ni tih regional governor Ihor Taburets chuan a sawi.

Chhim lama Dnipro khawpuiah pawh missile hian chenna in fuhin, mi pahnih an thi niin regional governor Serhiy Lysak chuan a sawi a, mi pathumin hliam an tuar bawk.

Ukraine sipaite chuan Russia sipaite missile kahchhuah 32 zinga 21 chu an lo kahthlaksak niin an sawi. President Volodymyr Zelenskyy chuan Russia missile in a kahchhiat thlalakte chu Telegram-ah dah langin, "Russia chuan Ukraine leh khawvel ram dangte hnen aṭangin chhanna a dawn ngei a ngai a ni," a ti.

Ukraine khawpui, Kyiv-ah pawh thil puak rite hriat niin, official-te chuan missile 11 leh drone pahnih chu air defence unit-ten an lo kapthla tih an sawi. Kyiv khawpui chhim lam, Ukrayinka-ah mi pahnihin hliam an tuar a, Kremenchuk leh Poltava khawpui bakah, chhim lama Mykolaiv khawpuiahte pawh thil puak ri hriat a ni bawk.