Sub-Saharan Africa-ah chaw khawp kham lo 239 awm

Africa rama Sahara thlaler chhim lam (sub-Saharan Africa) bial chhunga cheng, mi maktaduai 239 chu rilṭam leh chaw khawp kham loa an awm thu United Nations Food and Agriculture Organization (FAO) chuan a tarlang.

Hemi chungchang hi FAO Deputy Direc­tor General Marina Helena Semedo chuan tarlangin, "Helaia rethei taka awmte harsatna kan sutkian theih nan chuan muanna leh hmasawnna tura hmalakna nasa tak neih pui a ngai a ni. Silaia inbeihnate tihtawp a nih a, kan vaia inlungrual taka kan thawh ho theih chuan hma kan sawn dawn a ni," a ti. 

AU Commissioner for Rural Economy and Agriculture of the African Union, Josefa Sacko chuan. "Ngaihtuahna thar hmanga rilṭamna leh chaw khawp kham lohna awm hi kan um bo a ngai dawn a ni," tiin a sawi ve bawk. 

Kum 2015-a UN hmalaknaa Sustainable Development Goals (SDGs) duan a nih khan, he SDGs hnuaia thil tum pahnihna chu kum 2030-ah rilṭamna nuai bo tih a ni. He thil tum a hlawhtlin theih nan hian nikum September thla khan FAO chuan 'hand in hand initative' chu a kalpui chho ṭan a, sub-Saharan Africa bial chhunga awm mipuite tan 'hand in hand initiative' hnuaiah hian khawl lama hmasawnna tur hrang hrang leh, mipui mimirte khawsakna a lo changkan chhoh zel theih nana a hmalak a ni. UN body chuan thingtlang mirethei zawkte sum lakluh tihpun dan kawng a ngaihtuah mek a ni.