Sudan tualchhung indonain kar 3 awh tawh

Sudan rama thuneihna inchuha Sudan Army leh paramilitary force, Rapid Support Forces (RSF)-te inbeihna chu Inrinni liam kha kar thum a tlinna a ni.

April 15 aṭanga army chief Abdel Fattah al-Burhan kaihhruai Sudan Army leh, Mohamed Hamadan Daglo kaihhruai RSF-te inbeihna avang hian mi 500 chuang an thi tawh. Pawl pahnihte hian civil miten an mamawh leh damdawi lam enkawlna an dawn a, ramdang mi awmte tana inthiarchhuahna hun siamsakna turin inkahhai puang ṭhin mah se, an inremna siam hi an zawm lo ve ve a ni. Mi maktaduai nga vel chenna, Khartoum khawpuiah chuan chhungkaw tam takin khawmkhawp chaw, tui thianghlim leh electricity an nei tawh lo a ni. Mi tam tak chu an ṭhenawm, Chad, Egypt, South Sudan leh Ethiopia-ahte an tlanchhe tawh bawk.

UN secretary-general Antonio Guterres chuan, ram a tlakchhiat mek laia thuneihna inchuha lo indo chu awmze nei lo a ni tih a sawi.

Hetih lai hian sipai pawl pahnih hotute hi tualchhung indona thlenga mawhphurtuah an inpuh tawn. Burhan chuan RSF chu helpawl, Sudan ram tihchhiat vek tum tiin a puh a, Daglo chuan sipai hotu chu 'phatsantu' tiin a sawi ve bawk. RSF-te Sudan Army-ah lakluh tum chungchangah hotu pahnihte hi an thu a inhmu thei lo a ni.

World Food Programme chuan Sudan ramah hian tualchhung indona a thlen hma pawhin an ram mipui hmun thuma ṭhena hmun khat, mi maktaduai 15 vel chu ei leh in lama chhawmdawl ngai an ni a, tualchhung buaina thleng hian an ram dinhmun chu a tichhe lehzual dawn a ni, a ti.

Sudan khawpui, Khartoum leh a chhehvela hosptial awm zinga 70% vel chu hna thawk thei loin an awm tawh a, hospital ṭhenkhat chu beih tel an ni tih Doctors' Union chuan an sawi bawk.

Pawl pahnihten mipuite insasengna hun siam a, ni thum chhung atana inkahhai an puan chu nizan kha a tawp hun tur ni mah se, Sudan Army chuan nimin chhun khan Khartoum aṭanga RSF-te um chhuah tumin hmun hrang hrang aṭangin a bei a, airstrike leh heavy artillery te a hmang.