Afghan hmeichhiaten Taliban sorkar pawm lo turin ram dangte an ngen
Afghanistan khawpui, Kabul-ah Inrinni liam ta khan Afghan hmeichhe ṭhenkhat chuan lungawi lohna lantirina, an rama rorellai Taliban sorkar chu pawm lo turin ram dangten an ngen.
Kum 2021-a Taliban-ten civil sorkar paihthla a, thuneihna an chan hnuah Afghan hmeichhiate khuahkhirhna hrang hrang a siam chho leh tawh a ni. Inrinnia hmeichhe pungkhawmte hian Taliban-te chuan hmeichhiate dikna chanvo chu a rahbehsak a ni tiin lungawi lohna an lantir. Pungkhawmte hnawh darhna atan security force-te chuan silaite an hmetpuak a ni.
Pungkhawmte hian 'Taliban sorkar pawm chu hmeichhiate dikna chanvo palzutna a ni," tiin an au. Mahse security force-te an hnawhdarh zui avangin minute 10 vel chauh kawng an zawh hman.
Afghanistan-a Taliban sorkar hi eng ram mahin an pawm thu an la sawi lo. Taliban sorkar hmasa, kum 1996-2001 chhungin ram pathum - Pakistan, UAE leh Saudi Arabia chiahin an lo pawm tawh bawk.