Sudan-a sipai pawl pahnihten inkahhai pawtsei

Sudan-a indo mek, Sudan Army leh paramilitary force, Rapid Support Forces (RSF) te chuan inkahhai an puan an pawtsei a, hetih lai hian hmun hrang hrangah an inbei chhunzawm reng tho a ni.

Tualchhung indona thleng mek avanga civil miten hmun him lam an pan theihna tur leh, mipuite hnenah chhawmdawlna sem a nih theihna atan ram hrang hrangte chuan sipai pawl pahnihte hi inkahhai puang turin an nawr a ni. Inremna hi siam mah se hmun ṭhenkhatah an inkap chhunzawm reng tho a, civil mi tam tak an tlanchhe tawh bawk.

Pathianni khan hospital hrang hranga hman tur, damdawi lam thil chu ton riat zet Sudan-ah hian phurh luh a ni. Tualchhung indona thlen hnuah hospital ṭhenkhat chu beih tel an ni a, hei bakah hian medical supply awm loh vang te, thawktu indaih lo leh, tui leh electricity awm loh vangin hospital eng emaw zat chuan hna an thawk thei tawh lo bawk. International Committee of the Red Cross chuan damdawi leh a hmanrua phurh luhte hi hospital hrang hrangah an sem dawn a ni. ICRC chuan Pathiannia an phurhluh zingah hian indona thleng vanga hliam tuarte enkawlna tur hmanruate a tel tih a sawi.

Sudan health ministry chuan an rama inbeihna thlengah hian mi 528 an thi tawh a, mi 4,500 velin hliam an tuar tih a sawi. An ram khawpui, Khartoum-ah an inbei nasa ber a, khawpuia cheng mi tam tak chu ramchhung hmun dang leh, an ṭhenawm ramah te an tlanchhe tawh a ni.