Turkey-ah ISIL hruaitu kaphlum

Turkey intelligence force-te chuan ISIL pawl hotu, Abu al-Hussein al-Husseini al-Qurashi an kaphlum tih Turkey president Recep Tayyip Erdogan chuan a sawi.

President Erdogan chuan intelligence force-te hian ISIL hotu hi hun rei tak an chhui zui hnuah beihpui an thlak tih sawiin, Inrinni khan Syria ramah an kaphlum tih TRT Turk broadcaster-in a kawmnaah a sawi a ni. Firfiak pawl chu thlei bik nei loin an bei chhunzawm zel dawn tih a sawi zui bawk.

Syria tualchhung media-te chuan he inbeihna hi Syria hmarlam, Turkey thlawp helpawlten an thunun mek, Jinderes khuaah a thleng niin an sawi. He khua hi kumin February 6-a lirnghing na tak thleng tuar nasa ber zingah an tel a ni.

ISIL lam hian an hotu kahhlum nia sawi chungchangah thuchhuah engmah an la siam lo thung.

Al-Qurashi hi an pawl hotu thah a nih hnuah, kum 2022 November thla khan ISIL hotuah hian a awm a ni. Kum 2014 khan Abu Bakr al-Baghdadi hona hnuaiah ISIL hian Iraq leh Syria ram zau tak an la a, Islamic lalram an din thu an puang. Mahse US thlawpna hnuaiah Syria leh Iraq sipaiten firfiak pawl laka beihpui an thlak hnuah, an ram lak zau tak chu an chhuh let leh nghal a ni. ISIL member la awmte hi Syria leh Iraq ram hmun kilkhawrah an inkhuar mek a, pawikhawihna pawh an la thlen fo a ni.