Israel jail-a chaw ngheia nawrh huaihawttu Islamic Jihad hruaitu Khader Adnan a thi

Israel jail-a tang lai, Palestinian mi Khader Adnan chuan chhuah phuta ni 86 zet chaw ngheia nawrh a huaihawt hnuah nimin khan nikhaw hre loin a awm a, a hnuah a thi zui a ni.

Khader Adnan a thih thu puan a nih hnu lawkah Gaza Strip aṭangin rocket pathum hmangin Israel hi kah a ni nghal a, mahse hliam an awm lo.

Israel Prison Service chuan Adnan hian hun rei tak chaw a nghei avanga a chauh hnuah pawh damdawia enkawl a duh lo tih an sawi.

Kum 44 mi, Adnan hi Islamic Jihad hotu zinga mi niin, firfiak zawnga chetna kaihhnawihah man a lo tawk fo tawh a ni. A hma pawhin jail-ah hian ṭum li chaw ngheiin nawrh a lo huaihawt tawh a, hei vang hian Palestinian zingah hriat a hlawh phah hle.

Israel jail-a tang Palestinian-te hian an lungawi lohna lantirnan chaw ngheia nawrh an huaihawt fo a, mahse damdawia enkawl zui an nih ṭhin avangin thih phah erawh an awm khat hle. Israel jail-ah hian Palestinian mi tang 4,900 vel an awm mek.

Adnan hi Jenin khawpui bul, Arabba-a a chenna in aṭanga man a nih hnuah, kumin February 5 aṭang khan chaw a nghei a ni. Tun thla hian a thubuai hi ngaihtuah tura tih a ni. Israel thuneitute chuan Adnan hian Israel beihna atana firfiakte chetna thlawp leh, buaina chawk chhuak thei zawnga thilti ṭhinah an puh. Mahse Palestinian prisoners' right group, Addameer chuan Palestinian activist-te hrekbehna atana thu dik lo hmanga hren beh a ni tih an sawi thung.

Kar liam ta khan Palestinian Prisoners' Club chuan Adnan hriselna chu a ṭha tawh lo hle tih sawiin, central Israel-a Ramla tan-ina clinic-ah dah a nih thu an sawi. Mahse Adnan hian damdawi lama enkawlna leh, a taksa tana ei tur ṭha pekte chu a dawng duh lo. A nupui, Randa Mousa chuan a pasalin damdawi enkawlna a dawn duh loh chhan chu civilian hospital-ah dah tur leh, a lawyer hmuh a dilna Israel thuneituten an remtih loh vang niin a sawi.

Israel Prison Service chuan nimin khan Adnan hi a cell-ah nikhaw hre loa a awmlai hi an hmu a, damdawi-in panpui nghal ni mah se an chhan thei ta lo niin an sawi.

Hetih lai hian Palestinian Authority prime minister Mohammed Shtayyeh chuan, Israel chuan a mi tang Khader Adnan chu chhuah a dilna te hnawlsak a, damdawi hmanga a enkawl duh loh leh, a hriselna ṭha lo tak chunga a cell-a an dah zel avangin tum reng vangin an that ta a ni, a ti.

Islamic Jihad hi Gaza Strip-a Hamas dawtah pawl chak ber niin, Adnan thihna chu chhan lohin a awm dawn lo tih an sawi.