US-in Covid 19 vaccine la tura khualzinte a phutna titawp dawn

US chuan May 11 aṭangin an rama khualzin lut turte Covid-19 vaccine la kher tura an phutna chu a titawp tawh dawn tih a sawi.

White chuan thuchhuah siamin, "Sorkar hnathawk, sorkar contractor leh international air traveler-te tana Covid-19 vaccine la tura kan phutna chu May 11 aṭang hian hlih a ni ang a, hemi ni vekah hian Covid-19 public health emergency chu chawp leh chilhin a tawp nghal bawk ang," a ti.

United States-ah hian mi maktaduai chuang chu Covid-19 vangin an thi tawh a ni. "January 2021 aṭanga chhiarin, Covid-19 vanga thi hi 95% velin a tlahniam a, hri kai damdawi-ina enkawl ngai chu 91% in a tlahniam bawk. Khawvel pumah Covid-19 hri len ṭan tirh aṭanga chhutin hri vanga thihna hi a hniam lai ber a thleng mek a ni," tiin an thuchhuahah hian an tarlang.

White House chuan, "Huam zau zawka vaccination campaign kan kalpuina chuan rahṭha chhuahin mi maktaduai tel nunna a chhanhim phah a ni," an ti.

Vaccine rules an tihtawp rual hian President Joe Biden chuan thla hmasa khan kum thum chhung zet an lo kalpui tawh national health emergency chu official-in a tihtawp thu a puang a, heng zingah hian a thlawna Covid test leh vaccine lak te pawh tihtawp zui a ni.