Taliban FM-in Pakistan leh China FM-te hmu dawn

United Nations Security Council committee chuan Afghanistan-a rorellai, Taliban interim foreign minister Mawlawi Amir Khan Muttaqi chu Pakistan ramah a zin a, Pakistan leh China foreign minister-te a hmuh a phalsak.

Pakistan-a UN mission chuan Muttaqi hi May 6-9 inkarah Pakistan rama a zin phalsak turin an dil a ni.

Taliban-ten kum 2021-a Afghanistan-a civil sorkar paihthla a, thuneihna an hnehchhuh hnuah UNSC chuan hrekna hrang hrang a siam zui a, Muttaqi pawh a hrek zingah telin, ram pawnah a zinchhuah khap a nih bakah, a thil neihte khawih chet theih lohin a dahsak bawk.

Mahse UNSC committee chuan Pakistan leh China foreign minister-te hmu a, Afghanistan ram boruak ṭha leh muanawm a awm theihna tura meeting a neihpui hi a remtihsak ta a ni.

UN secretary-general Antonio Guterres chuan Thawhṭanni khan Doha-ah ram leh international institution 20 chuang aiawhte hmuin, Afghanistan-a Taliban rorelna hnuaia hmeichhiate dinhmun leh an harsatna tawh chungchangte a sawipui a ni. He meeting-ah hian Taliban aiawhte erawh sawm an ni ve lo.