Russia-Ukraine indonaah nikum December aṭangin Russia mi 20,000 thi tawh

Ukraine khawchhak lam, Donetsk region-a Russia leh Ukraine indona avangin nikum December aṭanga chhiarin, Russia mi 20,000 an thi tawh a, mi dang 80,000 velin hliam an tuar bawk niin US chuan a chhut.

White House National Security Council thupuangtu, John Kirby chuan US intelligence data thar ber behchhanin thi leh hliam tuar zat hi an chhut tih a tarlang. Mahse intelligence lamin heng number te hi an chhut chhuah dan erawh a sawilang lo.

Indonaa thi Russia sipai zinga a zahve vel chu private military company Wagner Group kaltlanga sipaia lakte an ni. An zinga a tam zawk hi Russia tanin hrang hrang aṭanga lak an ni.

Ukraine khawchhak lama an inbeihna nasa ber chu Bakhmut khaw bulah niin, heng hmunah hian Wagner sipaia lakte leh sipai dangte chuan Ukraine sipaite chu an hmachhawn a ni. "Russia hian beihpui an thlakah Bakhmut an sawrbing deuh ber a, mahse a hlawhchham thung. Russia hian eng territory mah hi an thunun lo a ni," tiin Kirby chuan a sawi bawk.

Ukraine ground forces hotu, Oleksandr Syrskyi pawhin Russia chuan Bakhmut lak tumin theihtawp chhuah mah se, a la hlawhchham zel tih a sawi. "Khawpui hmun ṭhenkhatah chuan kan sipaite chuan hmelma chu beiin an awmna hmun pawh an tlanchhiatsan tawh a ni," a ti.