Palestinian group leh Israel sipaiten Gaza-ah inkahhai an puang

Israel jail-a tang, Islamic Jihad hruaitu, Palestinian mi Khader Adnan a thih hnuah Gaza Strip aṭangin rocket hmangin Israel kah a ni a, Israel sipaite pawhin an ram beihna hi chhang letin Thawhlehni zan khan airstrike an nei zui ve nghal bawk.

Mahse Egypt, Qatar leh United Nations official-te hmalaknain, inbeihna nasa zawk a thlen hmain nimin zing khan Israel sipai leh Palestinian armed group-te chuan Gaza Strip-a inkahhai puan an remti ta a ni.

Israel jail-a tang, Islamic Jihad hotu Khader Adnan chu chhuah phuta hun rei tak chaw ngheia nawrh a huaihawt hnuah Thawhlehni khan a thi a ni. A thih thu hriat a nih hnu lawkah Gaza aṭang hian Israel chu rocket hmanga kah zui nghal a ni. Israel sipaite hian Gaza aṭang hian rocket 30 vel kahchhuah a ni tih sawiin, heng zinga pahnih chu Gaza khawchhak lam, Israel ram chhunga Sderot khuaah a tla a, mi pathumin hliam an tuar niin an sawi. Thil tihchhiat liantham erawh a nei lo. Rocket tam zawk chu Iron Dome air defence system hmangin an lo kapthla a ni. Gaza-a Palestinian pawl hrang hrang chuan thuchhuah siamin, rocket chu Adnan thihna phuba lakna atana kah a ni tih an sawi.

Rocket hmanga beih an nih avang hian Thawhlehni zan khan Israel sipaite chuan fighter jet leh tank hmangin Gaza Strip hi an bei zui ve nghal. Palestinian pawl ho hmun pawimawh eng emaw zat an bitum a ni. Israel sipaite chuan civil mite an bei tel lo tih an sawi nghal bawk.

Israel sipaiten beihpui an thlak tihtawp a nih theihna atan hian Gaza Strip-a rorellai, Hamas chuan Egypt, Qatar leh UN official-te biain, anni hmalakna hnuaiah inkahhai hi an puang thei ta a ni. Israel sipaite hian nimin varṭian aṭang khan Gaza an beihna pawh an titawp zui ve bawk.

West Bank-a Hebron khuaah chuan Adnan sunna hun hmangin dawrte khar a ni a, mi ṭhenkhatin lungawi lohna lantirna atan motor ke te halin, Israel sipaite chu lungin an táwng bawk. Israel sipaite hian pungkhawm hnawhdarhna atan tear gas leh rubber bullet-te an hmang a ni.