Russia Defence Minister-in Missile siam chhuah a leta tipung turin chah

Russia defence minister Sergei Shoigu chuan state company chu missile a siamchhuahte a leta tipung turin a chah.

Thawhlehni khan Sergei Shoigu hian an ram sipai hotute chu meeting a neihpui a, ralthuam an siamte tihpun leh rang zawka siamchhuah a ṭul thu a sawi. Hemi rual hian sorkar hnuaia Tactical Missiles Corporation chuan a contract-te chu a hun taka a zawhfel theih thu a sawi bawk.

Russia leh Ukraine-te hi hun rei tak an indo tawh avangin Russia hian ralthuam lam pawh a tlachham ṭan ni awmin military analyst-te chuan an ring a, a beihpui thlak pawh a hma anga nasain a kalpui lo nia sawi a ni.

Institute for the Study of War chuan Shoigu-a'n missile siamchhuah tam a ṭul chungchang a sawi hian, Ukraine nena indo mek Russia sipaite chu an mamawh ang ralthuam an pe reng thei tawh lo tih a tilang niin an sawi.