Israel sipaiten Nablus khuaah Palestinian 3 an kaphlum

Palestinian ministry of health chuan Israel sipaiten West Bank-a Nablus khaw hmarlam an beihnaah Palestinian mi pathum an kaphlum a, mi dang paliin hliam an tuar bawk niin nimin khan a sawi.

Ministry chuan Palestinian mi pahnihte chu tunge an ni tih hriat pawh harsa khawpin an taksa chu kahchhiat a ni tih a sawi bawk.

Israel army chuan an mi kahhlum zinga pahnih chu April 7-a Jericho khaw hmar lama Juda mite beitute an ni tih sawiin, British-Israeli hmeichhe pakhat leh a fanu pahnih that tute an ni, a ti. Shin Bet security agency, Israel Police leh Israel Defence Forces-ten thuchhuah inṭawm an siamah, sipaite hi Israel mi pathumte thattu man tum hian Nablus khuaah hian nimin zing khan lutin an tawmna in an hual a, inchhunga tawmte nen hian an inkap zui niin an sawi. Firfiak pahnihte bakah anmahni puitu pakhat an kaphlum a ni.

Israel defence minister Yaov Galland chuan Israel sipaiten nimin zinga Nablus khuaa an beihpui thlakna a hlawhtling chu lawmawm a tih thu sawiin, "Tenawm taka mi pathum nunna latu, firfiakte an nuaibo avangin kan security force-te ka fak hle a ni. Firfiakte kuta nunna chante chhungkaw pa ber, Leo hnena ka lo tiam tawh angin, pawikhawihtu firfiakte chu defence lamin a umzui zel ang," a ti.

Palestinian lam chuan kumin chhungin Israel sipai leh Palestinian ram an luaha Juda mi chengte chuan Palestinian mi 110 an that tawh a, an zingah hian naupang 20 an tel niin an sawi.