Russia-in drone hmanga Putin beih tumah Ukraine a puh
Russia chuan Nilaini khan Ukraine-in president Vladimir Putin-a chenna in bei tura drone pakhat a kahchhuah chu an lo kapthla niin a sawi. Mahse Ukraine chuan President Putin beih tuma puhna hi a pha thung.
Ukraine president Volodymyr Zelenskyy chuan Putin emaw, Moscow khawpui emaw an bei lo tih sawiin, Ukraine ram khawpuite venhimna tur chauha che an ni tih a sawi. Drone kahchhuah chungchangah inhnamhnawihna an neih loh thu leh, Russia chu dik lo taka puhah a puh let. Nilaini khan Russia-in Ukraine chhim lam, Kherson bial a beihnaah mi 21 an thi a, supermarket leh train station-te a bei tel niin Ukraine chuan a sawi.
Hetih lai hian Russia parliament, Kremlin chuan a thuchhuahah, Russia president nunna lak ngei tumin firfiakten a chenna in beih an tum tih a sawi ve thung. Mahse drone pahnih hi lo kapthlain, President Putin leh midangte pawh an him theih phah niin a tarlang. 'Hetianga beihna chhang let turin an theih leh a ṭul dan anga hma la turin Russia chuan dikna a nei a ni," a ti.
Kremlin thupuangtu, Dmitry Peskov chuan Nilainia drone hmanga a chenna in beih tum anih lai hian, President Putin hi a inah hian hna thawka a awm lai a ni, tiin karleh lama Red Square-a World War II Victory Parade neih turah Putin hi a tel theih tur thu a sawi nghal bawk.