Sudan tualchhung indona la ziaawm thei lo

Sudan Army leh paramilitary Rapid Support Forces (RSF)-ten an ram thuneihna inchuha an indona chuan ziaawm lam a la pan thei lo.

Sipai pawl pahnihte hi April 15 aṭang khan an inbei ṭan a, inkahhaite puang ṭhin mah se awmzia a nei lo a ni. A bikin an ram khawpui, Khartoum-ah President Palace leh Army headquarters changtu zawk nih tumin a la inbei ngawrh hle.

Nimin khan Khartoum leh Omdurman khawpuiah pawh an la inkap nasa hle. Ram hrang hrangten nawr mah se, Army chief general Abdel Fattah al-Burhan leh RSF hotu general Mohamed Hamdan Hemedti Dagalo-te chuan buaina tihtawp tuma inbiakna neih an duh thu an la sawilang lo ve ve a ni.

Tualchhung indona thleng mek avangin ram hrang hrangte pawhin Sudan-a an mi leh sa awmte an thiarchhuak mek a, Sudan mi tam tak chu himna zawngin an ṭhenawm ramahte an tlanchhe bawk. Indona avanga tualchhung miten harsatna tawk a, ei leh in leh mamawh dangte an tlakchham chhoh mek avangin, an mamawh lamkhawm leh, ram dang mi inthiarchhuak turte tan pawl pahnihte hian May 4-11 chhung inkahhai puan a lo remti tawh a ni. Mahse hetichung hian hmun tam takah an inbei chhunzawm tho a, an inremna siamte bawhchhe hmasaah an inpuh tawn a ni.