Myanmar sipai sorkarin tang 2,000 chuang ngaidam leh

Myanmar-a sipai sorkar chuan jail tang mi 2,000 chuang a ngaidam leh a, an zingah hian journalist leh activist-te pawh an tel nia sawi a ni.

State television MRTV-in a tarlan danin, sipai hotu lu ber general Aung Hlaing chuan Buddish-te ni thianghlim, Wesak pualin buaina chawk chhuaka puha thiam loh chantir, mi tang 2,153-te chu a ngaihdam a ni. An chhuah hnuah pawi an khawih zui leh a nih chuan hremna na tak pekah vau zui an ni thung.

Tang ngaihdamte hi Nilaini aṭang khan chhuah ṭan an ni a, chhuah kim vek tur erawh chuan hun a la duh deuh ang.

Sipai sorkar hian thla hmasa khan tang 3,000 chuang a lo chhuah tawh a, an zingah hian ramdang mi 98 an tel.

Tang chhuah thar zingah hian kum 2021 December thlaa sipai sorkar dodaltute nawrh huaihawt a report avanga man, freelance journalist Zaw Tun pawh a tel.

General Aung Hlaing chuan thi tura an chungthu relsak tawh, mi 38-te hremna pawh damchhung tang turin a tihnepsak bawk. Mahse tute nge an nih erawh sawilan a ni lo. Assistance Association for Political Prisoners-in a tarlan dangin, Myanmar jail-ah hian thi tura an chungthu relsak tawh mi 112 an awm mek a ni.

Kum 2021, February thlaa Myanmar sipaiten civil sorkar thuneihna hnehchhuh a, sorkar an siam hnuah mi tam takin sipai sorkar duh lohna an lantir a, tun thlengin ram chhung hmkun hrang hrangah tualchhung buaina a la chhuak chhunzawm reng a ni. Tualchhung buaina chhuaka hhian civil mi 3,452 an thi tawh niin Assistance Association for Political Prisoners chuan a tarlang.