Serbia-a inpawngkahna thlengah mi 8 an thi

Serman ramah Ningani zan khan inpawngkahna thlengah mi 8 an thi a, mi dang 10 in hliam an tuar. Hei hi tun kar chhunga Serbia rama inpawngkah a thlen ṭum hnihna a ni.

Ningani zan khan Belgrade khawpui chhim lam, km 60 vela hla Dubona-a park-ah mi pakhat, kum 20 mi vel chuan police officer nena an inhnialbuai hnuah an bul vela awmte chu a car aṭangin silaiin a pawng kah a, a tlanchhe zui nghal a ni.

Serbia police 600 velte chuan pawikhawihtu hi man tumin an zawng zui a, drone leh helicopter-te pawh hmangin nimin zing khan an man niin an sawi. Hliam tuarte hi damdawi-inah enkawl nghal an ni a, an zinga pahnih chu an dinhmuna ṭha lo hle.

Nilaini khan Beglrade-a school-ah mipa naupang, kum 13 miin a zirlai puite silaiin a pawng kah bawk a, mi pariat an thi. Thi zingah hian security guard pawh a tel.

Serbia ram hi silai khuah­khirhna dan khauh tak nei a nih avangin inpawng­kahna hi a thleng khat leh a, hetih lai hian Europre ram zingah silai kawl tamna ber zingah a tel thung. Belgrade school-a inpawngkahna a thlen hnu hian sorkar chuan kum hnih chhung atan silai permit thar pekchhuah a khap zui nghal.

Serbia sorkar chuan Nilaini leh Ningani zana inpawng­kahnaa thite hi ram pumah ni thum chhung sun an ni dawn tih a sawi.