Vawiinah King Charles lallukhum khumtir dawn

Britain lal King Charles III chu vawiin hian lallukhum khumtir a ni dawn ta.

London-a Westminster Abbey-ah Archbishop of Canterbury Justin Welby chuan Britain lal atan King Charles III chu thu tiamtirin a nemnghet dawn a ni. King Charles hian Bible-a a kut nghatin thu a tiam dawn a, a hranin 'protestant rinawm' tak a nih thu thutiam a la dawn bawk . Kum 1300-a siam, Coronotion chair-ah ṭhuin, rangkachak hlanga siam, kg 2.2-a rit lallukhum khumtir a ni ang.

Westminster Abbey-a hun hman hmain, an ram huna chawhma dar 10:20 aṭangin 'King's Procssion' hi neih a ni dawn a, Buckingham Palace aṭanga Westminister Abbey inkar, km 2-a thui an zawh dawn a ni. Coronation ceremony hi dar 11 aṭangin ṭan tur a ni.

King Charles hi chhun dar 12-ah lallukhum khumtir a ni dawn a, inkhawm hian chawhnu dar 1 thleng a awh ang. Abbey chhungah hian mi 2,300 velin an telpui dawn a, an zingah hian ramdang hruaitu leh lal chhungkua, Britain ram hruaitu leh civil society aiawhte an tel dawn a ni.

Pathianni hian Britain ram hmun hrang hrangah street party, 'The Big Coronation Lunch' buatsaiha ni dawn a, Pathianni zanah London-a Windsor Castle-ah Coronation Concert neih a ni bawk ang.. Thawhṭanni hi public holiday atan an puang a, lal chhungkua chuan hemi ni hian British mite chuan an vengah voluntary work ti turin an ngen.