WHO-in Covid global health emergency a titawp

World Health Organisation (WHO) chuan Covid-19 hrileng vanga global health emergency puan chu tihtawp a ni tih a sawi.

Official-te chuan khawvel huapin Covid-19 hri leng dinhmun chu a ziaawm tawh hle tih an sawi. A vanglai chho, kum 2021 January thla a chawlhkar khat chhunga mi nuai khat chuangte an thih hnuah, kumin April chawlhkar hnuhnung berah kha he hri vanga thi hi khawvel pumah mi 3,500 bawr vel an awm.

WHO hotu, Dr Tedros Adhanom Ghebreyesus chuan, Covid hri vanga thi hi mi maktaduai 7 vel an awm tawh a ni, a ti. Mahse hripui vanga thi tam tak chu official record-ah telh loh an awm a, hei vang hian Covid hri thihpui hi khawvel pumah mi maktaduai 20 dawn an awm a rinawm thu sawiin, he hri hi a la hlauhawm reng tih a sawi bawk.

Dr Tedros chuan, Emer­gency Committee-in khawvel huapa Covid-19 hri leng vanga public health emergency puan chu titawp tawh tura an rawt thu sawiin, an thurawn hi pawmin tihtawp a ni ta tih hi kar liam ta khan a puang a ni. He thutlukna siam dawn hian data-te pawh uluk takin an zirchiang a, hun rei tak an ngaihtuah thu a sawi. Public health emergency tihtawp avang chuan hri hlauhawmna chu a bo chuang lo tih sawiin, boruak awm dan azirin puan leh theih reng a ni tih a sawi. Health emergency puan chu ngaihṭhatna atana hman a, an inthlahdah phah a nih chuan thil pawi tak tur a ni, a ti.

WHO hian kum 2020, January thla khan Covid -19 hri leng vang hian public health emergency of international concern (PHEIC) a puang a ni.

Khawvelah Covid-19 hri kai chhin­chhiah hi maktaduai 765 chuang record a ni a, WHO-in a tarlan danin Covid vaccine hi dose tluklehdingawn 13 pekchhuah a ni tawh.