Texas Mall-a inpawngkahna thlengah mi 8 an thi

US-a Texas state-ah kar liam ta Inrinni khan mi pakhatin Mall-a awmte silaiin a pawng kah a, mi pariat a kaphlum a, mi dang pasarihin hliam an tuar. Pawikhawihtu hi police-ten an kaphlum ve nghal bawk.

He thil thlenna hmun hi Dallas khawpui hmarlam, Allen-a Allen Premium Outlets mall a ni a, pawikhawihtu hian thurualpui dang a nei lo nia hriat a ni a, a pawikhawih chhan hi hriat a la ni lo bawk. Thi zingah hian naupangte pawh an tel nia sawi a ni bawk.

Pawihkhawihtu hi thawmhnaw dum veka inthuamin, combat gear vuahin, AR-15 style rifle a hmang a ni. A hming leh a nihna erawh puanzar a la ni lo.

Tezxas-ah hian puitling, kum 21 chunglamte chu licence nei kher lo pawhin silai an ken phalsak an ni. US-ah hian inpawngkahna a thleng ngun hle a, Gun Violence Archive-in a tarlan danin, kumin bikah pawh inpawngkahna, mi pali leh aia tam thi leh hliam an awmna hi ṭum 195 lai a thleng tawh a ni.