Iraq jail-ah hmeichhiaten chaw ngheia nawrh huaihawt

Iraq khawpui, Baghdad jail-a tang hmeichhia 400 vel chuan chaw ngheiin nawrh an huaihawt mek.

Heng hmeichhiate hian Islamic State group-a tela puha mante an ni a, an chungthu relsak an nih dan chu a dik lo niin an sawi. An zingah hian Russia, Turkey, Azerbaijan, Ukraine, Syria, France, Germany leh US mite an tel. An tannaah hian naupang 100 vel an awm nia sawi a ni bawk.

Islamic State, ISIS tih bawk hi Islam lalram din tumin Syria leh Iraq an bei a, an inbeihnaah hian mi sang tam tak an thi a ni. Kum 2017 khan an tlawm a, hemi hnu hian an pawl member nia sawite chu man an ni a, mipate chu tihhlum niin hmeichhia leh naupangte chu Syria leh Iraq jail-ah dah an ni. Heng hmeichhiate hi kum 15 aṭanga damchhung tang tura hrem an ni.

Hetih lai hian hmeichhiate hian man an nih chhan leh, thiam loh chantir an nih danah lungawi loin chaw ngheia nawrh hi an huaihawt a ni. An zinga ṭhenkhat chuan an chungthu chu minute 10 chhung lekin rel felsak an ni a, an ṭawng hriatthiam loh, Arabic ṭawnga inziak lehkhaah hming sign luih tir an nih thu an sawi. An chungthu ngaihtuah a nih lai hian embassy leh an ram palaite pawh an be thei lo tih an sawi bawk.

Hmeichhe nawrh huaihawtte tanna hmun hi Baghdad khaw chhak lama awm niin, cell khatah mi 40-te awmin an tawt hle tih an sawi a, kutthlak leh tihnawmnah pawh an tuar fo niin an sawi bawk a ni.