Pakistan rorellai party hruaitu hrem

Pakistan-a rorellai, Pakistan Tehreek-e-Insaf party chuan Lahore-a an party general secretary, Mian Karam Usman chu Hindu sakhua beihna poster a tar avangin an hrem. 

Mian Akram Usman hian February 5-a an ramin Kashmir thlawpna ni, Kashmir Solidary Day an hman denchhen khan 'Hindu te chu ṭawngkama hrilhfiah theih an ni lo, tharum hman a ngai' tih thuziak chu Lahore khawpuiah a tar a ni. Hei hian sawisel a hlawh a, an party pawhin ngaihdam a dil phah hial. He poster a tar avang hian Usman hi party general secretary a nihna aṭangin an suspend nghal a, a chungthu hi special committee ngaihtuah turin dah a ni bawk. 

Hetih lai hian Usman chuan poster chungchangah a printer lam thiam loh niin a sawi thung a, India prime minister Narendra Modi beih a tumna a nih laiin, a printer lam hian Modi hming chu Hindu tiin an lo thlak daih a ni, a ti. An tihsual hi a hriat veleh poster ho pawh a lak thlak tir nghal vek niin a sawi.