WFP-in Palestinian-te ei tur pek titawp rih dawn
World Food Programme (WFP) chuan Palestinian mi nuai 2 chuangte chhawmdawlna ei tur a pek ṭhin chu sum lam indaihlohna nasa tak vangin thla thar aṭangin a titawp dawn tih a sawi.
WFP country director, Samer Abdeljaber chuan fund a awm tawh loh vangin, June thla aṭangin chhawmdawlna an pek ṭhin aṭanga 60%, mi nuai 2 chuang an ṭanpuina chu tihtawp a ngai dawn tih a sawi.
Ṭanpuina an tihtawp hi Gaza Strip-a chengten an tuar nasa ber dawn a ni. Islamist Hamas pawl rorelna, Gaza-ah hian mi maktaduai 2.3 vel chengin, an zinga 45% chu hna thawh nei lo an ni a, 80% vel chu ramdang chhawmdawlna ringa khawsa an ni.
UN agency hian Palestinian mi, dinhmun harsa zawkte tan hian thla tin mi pakhat tan USD 10.30 hu voucher leh ei tur a pe ṭhin. Programme an tihtawp hian ei tur bakah voucher an pek ṭhin pawh hi a huam dawn a ni.
West Bank leh Gaza-a cheng, Palestinian mi nuai 1.4 vel erawh chu chhawmdawlna hi pek chhunzawm an la ni ang. Mahse fund an dawn chhunzawm loh chuan, heng mite ṭanpuina pek pawh hi August thla aṭang chuan tihtawp a ngai tawh dawn tih Abdeljaber chuan a sawi.
WFP-in chhawmdawlna a pek tihtawp a tum duh lohna lantirin Pathianni khan Gaza City-a an office kawtah Palestinian mite a pungkhawm. Kalkhawmte chuan sum lakluhna dang an neih loh avangin UN agency aṭanga voucher an dawn chu a innghahna awmchhun a ni tih an sawi a, hei hi tihtawp a nih chuan thi tura hnutchhiah nen an inang reng a ni tiin, rilṭama an thih mai tur thu an sawi.