Israel-in West Bank-a Palestinian school ṭhiahsak

Israel chuan Pathianni khan an ram luah, West Bank-a Palestinian school a ṭhiahsak. He school hi European Union sum hmanga din a nih vangin EU chuan a sawisel zui.

Israel sipaite chuan thuchhuah siamin, school an ṭhiah tak hi Bethlehem khua aṭanga km 2 vela hla, Herodium national park-ah kum 2017-a phalna nei loa sak a ni tih a sawi. School building hi a ṭhat tawk loh avangin a chim mai hlauhthawnawmin a awm a, zirlaite leh he hmun tlawhtute tana a him loh avangin March thla khan District Court chuan ṭhiat turin a lo ti tawh a ni. Hemi hma hian school structure a him tawk loh vangin building neitu pawh thuneituten ṭum eng emaw zat inbiakna neihpui an lo tum tawh tih Israel official chuan a sawi bawk. Buiding neitu lamin an ngaihven duh loh avangin ṭhiah a ni ta tih sawiin, he school-a zirlaite chu a bul hnai school-ah kal chhunzawm tir an ni dawn tih a tarlang.

Hetih lai hian EU leh Palestinian Authority chuan school building ṭhiah a ni chu sawiselin, West Bank-a EU Representative Office chuan Palestinian zirlai 60 in an tuar phah dawn a ni, a ti. Naupangte right to education chu zahsak a ṭul thu leh, school building ṭhiah chu international law hnuaih dan kalh a nih thu a sawi.

Palestinian Education Ministry pawhin school ṭhiahsak an ni chu pawikhawihna tenawm tak a ni tiin zirlai, zirtirtu leh zirna in bitum a ni chu international law zah lohna a ni tih a sawi ve bawk.