Canada-ah ram kang vangin emergency puang

Canada-a Alberta province-ah ram nasa taka a kan avangin provincial state of emergency puan a ni a, mi 25,000 vel chu hmun him lamah sawnchhuah an ni tawh.

Province chhungah hian hmun 110 velah ram a kang a, ram kang ṭhelh tur hian Quebec leh Ontorio aṭangin kangṭhelhtute pawh koh luh belh an ni. Helicopter leh air tanker-te pawh ram kang ṭhelhnan hian hman an ni.

Khaw lum leh ro bakah thli a tleh tel avangin kangmei ṭhelh hi a harsa hle tih an sawi. Kangmei chhuahna tam zawk hi thunun thei tawh mah se, hmun 36 ami erawh chu an ṭhelh mit thei lo.

Alberta premier Danielle Smith chuan an province-a ram hectare 1,22,000 vela zauah kangmei hi a chhuak tawh tih a sawi a, hetianga nasa hian ram kang an la tuar ngai lo tih a sawi bawk.

Ram kang vang hian mi 8,000 chuangte chenna, Edson khuaa chengte chu an vaiin an khua chhuahsan tura hriattir an ni a. Kangmei chhuak hi province khawpui, Edmonton khawthlang lam km 140 vela hla, Drayton Valley leh a chhehvelah a nasa zual a, chenna in 20 chuang a kang tawh a ni. Alberta hi oil siamchhuahna hmunpui a ni a, mahse oil facility-te erawh an dinhmun a hlauhthawnawm rih lo nia sawi a ni.