Myanmar-ah ASEAN palaite chuanna convoy beih an ni
Myanmar-ah Association of Southeast Asian Nations (ASEAN) palaite chuanna convoy chu helpawl eng ber nge hriat loin an lo kap tih sipai official chuan Thawhṭanni khan a sawi.
ASEAN palaite chuanna convoy hian May 7 khan Myanmar khawchhak lam, Shan state-a Taunggyi khua an pan a, he convoy-ah hian Indonesia leh Singapore embassy-a diplomat-te leh, ASEAN hnuaia chhawmdawl hna thawknaa official-te an chuang. Mahse vanneihthlak takin helhoin an beihnaah hian thi an awm lo niin an tarlang.
Official leh diplomat-te hi mipuite chhawmdawlna pe tura kal an nih thu Indonesia president Joko Widodo chuan a sawi a, mahse kawng lakah beih an tawk ta a ni, a ti. ASEAN hruaitute hian tun kar hian Indonesia-ah summit an nei dawn a, he hunah hian Myanmar tualchhung dinhmun pawh an ngaihtuah lian ber tur zingah a tel leh rin a ni.
Kum hnih liam taa Myanmar sipaite civil sorkar paihthla a, thuneihna an hnehchhuh hnuah sipai rorelna duh loin ram chhung hmun hrang hrangah buaina a chhuak a, tun thlengin tualchhung buaina hi a la reh lo. Hetiang karah hian Shan state-ah erawh hmun dang aiin buaina hi a chhuak nep a, mahse kumin March thla khan sipai leh sipai sorkar dodaltute inkara inbeihna thlengah, monastery-a awm mi 30 vel kahhlum an ni.
Indonesia leh Singapore chuan Myanmar-a an palaite beih an ni chu an dem thu sawiin, ramchhung buaina thleng reng chu titawp turin an ngen zui bawk. Tualchhung buaina leh tharum thawhna thlengte chu stakeholder hrang hrangte inbiakna ṭha tak an neih hmang chauhin tihtawp theih a ni tiin, boruak ṭha leh muanawm siam tura hma la turin Singapore chuan Myanmar-a pawl hrang hrangte a ngen a ni.
ASEAN convoy beitute hi eng pawl nge tih hriat chian an la ni lo a, helpawl zingah tumahin an tih a nih thu an la sawi lo bawk. Sipai sorkar dodaltu pawl People's Defence Force (PDF) thawhpuitu, civil sorkar aiawhtu atana din National Unity Government chuan he thil thlengah hian inhnamhnawihna an neih loh thu an sawi. PDF lam erawhin engmah sawi an la nei lo thung.