China-in social media-a retheite dinhmun tarlanna video paih bo vek

China president Xi Jinping chuan kum 2021 khan an rama retheihna umbo tura an beihnaah hnehna an chan thu a lo sawi tawh a, hetih lai hian mi tam tak dinhmun chhe tak, rethei tak tak an la awm reng thung.

Hetih lai hian China thuneitute chuan an rama miretheite dinhmun lantirna video-te social media lama dahte chu a paihbo zel nia sawi a ni. New York Times-in a tarlan danin, March thla khan Cyberspace Administration chuan China sorkar leh rorellai party hmel tichhe thei, an ram economy leh social development lang mawi lo thei, mi retheite dinhmun leh harsatna awm chungchangte tarlanna video tihchhuah leh post khap a nih thu leh, a post-te chu hrem an nih tur thu a lo sawi. Hei vang hian sum lama mipuite inthlauhna leh, mi retheite harsatna tawh chungchang tarlan chu China ramah chuan pawikhawihna a tling a ni. Kum upa zawk, taksa lama rualban lo leh naupangte harsatna tawh dan, an lungngai leh hrehawm ti lai lanna video-te chu internet regulator chuan tihchhuah a khap a ni.

Hemi hma hian content creator Hu chuan China chhim thlanglam, Chengdu khuaa hmeithai, kum 78 mi a kawmna video a tichhuak a, he hmeithai hian thla khata a pension dawn leh a sum hmuhna awmchhun, yuan 100 hmanga a thil lei theih chhunte a tilang a ni. Mahse a hnuah social media aṭangin he video hi paihtir a ni a, Hu-a account pawh tihtawp sak a ni zui bawk.

Zaithiam pakhat, a hla hmanga China rama retheite dinhmun tarlang ṭhin pawh a social media acount tihtawp sak a lo ni tawh bawk.

Nikum khan China rama pem lut, inhlawhfa ṭhin chu Covid positive a ni chunga a chhungte chawmna tura hna a thawh dante social media-ah tarlan niin, mite ngaihven leh khawngaih pawh a hlawh hle. Mahse a hnuah social media lamah a chungchang sawinate chu block vek niin, journalist-ten a chhungte an hmuh theih lohnan an chenna kawtah tualchhung thuneitute an duty a ni.