Paramilitary force-in Pakistan PM hlui Imran Khan an man

Pakistan prime minister hlui Imran Khan chu nimin khan Islamabad High Court-a a awm laiin eiruk thubuai kaihhnawihah Pakistani Rangers paramilitary force-ten an man.

Imran Khan-a party, Pakistan Tehreek-e-Insaf (PTI) hruaitu Fawad Chaudhdry chuan, High Court chhung chu Ranger-te hian luhchilhin, lawyer-te chu an vau a, Imran Khan pawh chu High Court chhung aṭang hian hruaichhuakin an hreng zui tih a sawi. Pakistan ram chhung hmun hrang hranga an party mi leh sate chu lungawi lohna lantir nghal turin an chah bawk.

PTI chuan court chhungah Imran Khan-a lawyer pawh chu kutthlak a ni tih sawiin, a kawra thisen kai thlalakte pawh an tarlang tel bawk. High Court chhunga thil thleng chu Pakistan ram leh democracy tana ni duhawm lo a ni tih an sawi.

Imran Khan hi a nupui nena an enkawl, Al-Qadir Trust hnena Bhatir Town-in ram, Rs mtd 530 hu a pe nia sawi kaihhnawih, Qadir Trust case-ah man a ni tih Islamabad police-te chuan an sawi.

PM hlui man a nih avang hian a party mi leh sate nen buaina an chawh chhuah tur venthawn thilah, Islamabad khawpuiah punkhawm khapna thupek tihchhuah nghal a ni. Police-te chuan thupek zawm lote chungah action lak zel a ni ang, an ti.