Israel-in Gaza Strip a beihnaah mi 13 an thi

Israel chuan nimin zing khan thawhtheihna hmangin Gaza Strip a bei a, mi 13 an thi. Thi zingah hian Palestinian Islamic Jihad (PIJ) movement member pathum an tel a, civil mi thi pawh hi a tam zawk chu PIJ commander chhungte an ni.

Palestinian health ministry chuan Israel sipaiten indo thlawhtheihna 40 vel hmangin zing khawvar hma deuhin darkar hnih dawn Gaza Strip hi an bei tih a sawi a, mi 13 thi zingah hian naupang pali an tel tih a sawi bawk. Hliam tuar hi mi 20 vel an awm bawk a ni.

Gaza Strip chhung hmun hrang hrangah thil puak ri hriat a ni a, Israel sipaite hian residential apartment-te pawh an bei tel nia sawi a ni. PIJ chuan an commander pathumte chu Israel sipaiten an that tih sawiin, phuba lak ngei an tiam zui bawk.

Israel sipaite chuan air attack hi “Operation Shield and Arrow” tih vuahin, hei hi tun hnaia rocket hmanga Israel ram beitu, PIJ member pathumte beihna atana kalpui a ni tih an sawi.

Kar liam ta khan Israel jail-a tang, Palestinian mi Khader Adnan chu hun rei tak chaw ngheia nawrh a huaihawt hnuah jail-ah a thi a, a thih thu puan a nih hnu lawkah Gaza Strip aṭang hian Israel ram chu rocket hmanga kah zui a ni a, hei hi missile hmangin Israel sipaite chuan an chhang let zui ve nghal bawk a ni. Israel defence ministry hnuaiah COGAT unit chuan Gaza luhna, border crossing pahnih pawh khar nghal a nih thu a tarlang.