Islamabad Court-ah PM hlui Imran Khan an hruai

Pakistan prime minister hlui, Imran Khan chu Thawhlenhni khan man a ni a, nimin khan Islamabad court-ah hruai a ni.

Imran Khan man a nih hnu hian Islamabad bakah khawpui dang - Quetta, Karachi, Peshawar, Rawalpindi leh Lahore-ah amah thlawptute chuan lungawi lohna lantirin buaina a chhuak a ni. Buaina chhuakah hian mi pakhat a thi a, mi dang eng emaw zatin hliam an tuar. Sorkar building 14 chuang hal leh rawk a ni bawk.

Nimin khan Imran Khan-a party, Pakistan Tehreek-e-Insaf (PTI) chuan ram pumah nawrh an huaihawt zui bawk. PTI mi leh sate hian Rawalpindi-a Pakistan Army headquarters leh, Lahore Commander chenna inte an luhchilh a ni.

Pakistan police-te chuan Punjab province-a PTI member-te buaina an siamah police official 130 vel an hliam a, mipui pungkhawmte hian police motor 25 chuang an hal bawk niin an sawi. Buaina chhuak vang hian mi 1,000 dawn man an ni tawh.

PM hlui man a nih avanga tualchhung buaina a chhuah hnuah, nimin khan Pakistan pawisa hlutna chu 1.3% in a tlahniam nghal a, US dollar 1 leh Pakistan Rs 288.5 a intluk a ni.

Nimina court-a Khan hruai a nih dawn hian Islambabad-a H-11 ah venhimna tikhauh niin, police ṭhahnem tak duty tir an ni a, mipuite daidanna tur pawh siam a ni bawk.

International cricketer hlui, kum 70 mi Imran Khan hi kum li dawn Pakistan Prime Minister a nih hnuah nikum April thla khan vote hmangin paihthlak a ni.

Paihthlak a nih hnu hian eiruk thubuai leh, ram phatsan zawnga thiltia puhna hrang hrang thubuai a nei a, mahse court hearing neihah an inlan duh ngai lo thung. Amah zuitute chuan kumin October thlaa inthlanpui neih turah Khan hian a chuh ve theih lohna turin sorkar chuan thubuaite hi a siamsak niin an puh.