Jean Carroll hnenah USD mtd 5 pe turin Trump hriattir

US president hlui, Donald Trump chu kum 1990 chhoa mipat hmeichhiat lam hawia writer E. Jean Carroll chunga a chet avang leh, a hnua dawt sawitu tia puha a tihhmingchhiat zui avangin USD mtd 5 pe turin jury chuan a ti.

Jean Caroll-in Trump a puhna chungchang ngaihtuahtu jury chuan Thawhlehni khan thutlukna hi a siam a ni.

Hetih lai hian Trump-a lawyer, Joseph Tacopina chuan jury thutlukna siam hi an appeal dawn tih a sawi.

He thubuai hi April 25 aṭang khan ngaihtuah ṭan a ni a, thubuai ngaihtuahnaah Trump hi a awm ngai lo. Mahse Thawhlehnia jury-te thutlukna siam chu thil tenawm tak a ni tiin, dik lo taka puhtu hmeichhiate chu tunge tih a hriat loh thu a sawi nawn leh. He case hi civil case a nih avangin, Trump hian thiam loh chantir ni mah se jail a tang kher dawn lo a ni.

Kum 79 mi, Caroll hian kum 76 mi, Trump hian kum 1995 nge 1996 zawkah khan, Manhattan-a Bergdorf Goodman department store dressing room-ah a pawngsual a, an puhna hi thu dik lo leh phuahchawp tiin October 2022 khan Truth Social platform-ah sawiin a tihmingchhe zui niin a puh a ni. He thubuai ngaihtuahtu, jury team-ah hian mipa paruk leh hmeichhia pathum an awm a, darkar thum chhung an ngaihtuah hnuah thultukna hi a siam a ni. Mahse Trump hian a appeal leh dawn avangin, jury-in sum pe tura an tih hi a pek a la ngai rih dawn lo a ni.